Наьна дувцар

Марьям Костоева-Накастхоева Гостиная

«З1амига яр со-дувцар нанас —
Сибаре вай къам дугача хана.
Т1ем ха яр из, 1а дар шийла,
Доалар вай къам ч1оаг1а хала.

Дага йоаг1а сона из бирса 1уйре,
Из ди в1алла дицлургдац.
Лоамаш эгдеш дегаш делхар.
Даймехках вала атта дац!

Х1ара ц1аг1а чу а лелхаш
Салтеш ара боахар нах.
Дегашт т1ехьа лаьтта делхаш
Шоай Даьй-мехках къаьстар нах.

Даар доацаш, малар доацаш
Хало вай адамо лайр.
Наькъа лазарах кхалхараш
Каша доацаш бохкар лайл…

Лоамаш, фордаш т1ехьа дуташ
Дигар б1аьхача наькъа къам.
Х1ара дезало шийца хьора
Шой Даьй-мехкара лаьттан коан…

Кхо к1ира наькъа даьккха халла
Кхаьчар шийлача Сибаре нах.
«Нах буъ нах боаг1а» -аьнна хеза
Чу эцацар цхьакха ц1аг1а…

Зем а баьккха, майра баьнна
Арабувлар фусаман дай.
Къахетам баь х1ара ц1аг1а
Чуийцар цар адам вай.

Даъ хьам доацаш моцал ера
Кхайт1ара гулдора хьажк1ай фийгаш.
«Кхетаргдий-те ц1енах ц1аккха?»-
Адам дара Даймехках хьегаш.

Иман, барта ч1оаг1а хиларах
Бакъо яккхар къамо вай
Иштта кхойтта шу арахь даьккха
Ц1енгахь дийрзар адам вай.»

Тахан парг1ато а енна
Тоалуш латта вай Даьй-мохк.
Ираз долаш, барта болаш
Даькъала хийла, Г1алг1ай мохк!

Написать рецензию.